Tal dig in piasintein: Udur ad nustalgia

blank

Ritorna l’appuntamento con la poesia dialettale di Anna Botti che, questa mattina, all’interno di “Nessun dorma”, ha portato gli ascoltatori in un mondo fatto di ricordi, luoghi e profumi che hanno segnato la storia di molti di noi e che, nostro malgrado, non ritroveremo tanto facilmente …

blank

 

Udur ad nustalgia


In mezz a l’abbundansa

ad vadrein piin d’eleganza,

ad negozi piin räs ad nuvitä,

incö vurris girä a occ’ sarä

pr’urientäm col näz…

girä dadché e dadlà in päz,

seinz’avegh indicazion,

pr’urientäm con i’emuzion.

Vurris tastä i parfüm dal mettein

e gustä ancura l’udur dal lattein,

dal bütter in sal bancon,

dal latt in dal piston,

cull parfüm magich ad bianc,

sogn da ragazz….dez franc,

d’inveran, par la panna muntä

e pr’al gelato ca gh’era d’estä.

Fra l’äria püra, sö par la via,

vurris truvä la mé panetteria

ca slargäva inturan al so udur

ad bona giurnä, ad bon ümur,

fragranza ad turta, ad pan,

ad chizzöla, ad busslan.

Vurris nazä l’udur dal früttarö,

i väs ad vedar con dein i fazö,

udur ad frascüra in tütt ill stagion

dai dé dla patona al mez di mlon.

Vurris incunträ l’udur dal cartulär,

dl’inciostar, dla cartella da sculär.

Vurris pruvä la strana maraviglia

dal mis’ciòss ad tuffgnon e vaniglia

ad cla drugheria c’l’era un büs

ad tri o quattar métar, seinza lüz.

Udur ad poca ricchëzza e botta puvartä,

bon o gram in dla memoria is enn fissä.

Udur dla stoffa dal marcant,

dal marcantein, dla pell di guant,

udur dal calzulär, dal salümér,

d’ustaria, ad tütt i vecc’ mistér…

No, sum pö bona d’urientäm a occ’ sarä,

… mancan i’ udur in dla mé cittä,

brüsä in dal fuglär dla nustalgia

tant cm’una veccia foto tratta via.

Parfüm… udur…

nascost dai teimp dal traffich, di rümur,

udur ad chiétt…

udur dla scola, dla ceza,

udur dla duttreina in sagrestia,

dla vöia da zügä pena dop l’ävemaria,

udur d’incens, ad candel, ad sira,

udur lassä indré dal noss mond ca gira.         

Radio Sound

Radio Sound, il Ritmo che Piace, il Ritmo di Piacenza

blank blank App Galley blank